Cefnogaeth i ffermwyr a pherchnogion tir yng Nghymru sy’n ceisio ymdopi â newid

Mae ffermio yng Nghymru yn dechrau pennod newydd – mae polisïau, blaenoriaethau a’r ffordd y mae tir yn cael ei gefnogi yn newid – ac i lawer o ffermwyr a pherchnogion tir mae hyn yn dod ag ansicrwydd yn ogystal â chyfle.

Rydym yn deall bod hwn yn gyfnod cymhleth. Efallai y byddwch yn canfod eich hun yn ceisio gwneud penderfyniadau anodd ynglŷn â dyfodol eich tir, eich busnes a’ch etifeddiaeth.

Allwn ni ddim cymryd arnom ein bod yn gwybod yr holl atebion ac yn gallu datrys yr holl gymhlethdod, ond yr hyn y gallwn ei addo yw y byddwn ni yno i chi â chymorth ymarferol, ar seiliau cadarn, sy’n seiliedig ar ddealltwriaeth go iawn o ffermio yng Nghymru, a allai eich helpu i feddwl am eich dulliau ffermio yn y dyfodol.

Tyfu â choed

Mae llawer o ffermwyr a pherchnogion tir yng Nghymru yn cydnabod gwerth coed a gwrychoedd/perthi i’w busnes ers blynyddoedd – boed yn gysgod i gefnogi iechyd a lles anifeiliaid; yn ddeunydd pori maethol i ategu deiet; yn ffordd o nodi terfynau a sicrhau bioddiogelwch neu er mwyn gwella pridd a chefnogi natur.

Nawr, wrth i’r dirwedd ffermio esblygu, bydd y nodweddion tirwedd coed hanesyddol hyn yn chwarae mwy fyth o ran ac yn helpu ffermydd drwy:

• adeiladu gwydnwch i allu dygymod â newidiadau, a phatrymau tywydd eithafol, a thywydd anarferol
• gwella lles anifeiliaid ac ansawdd eu hamodau pori
• diogelu a gwella priddoedd, cyrsiau dŵr a bioamrywiaeth
• cysoni â chyfleoedd posibl i sicrhau cyllid a pholisïau sy’n newid.

Ledled Cymru, mae ffermwyr a pherchnogion tir wedi bod yn gweithio gyda Coed Cadw er mwyn integreiddio coed mewn ffyrdd sy’n ategu eu gwaith, eu busnes fferm.

Isod gallwch glywed gan rai o’r ffermwyr sydd wedi canfod gwerth mewn gweithio gyda ni yn y gorffennol. Mae eu storïau’n dangos sut mae gweithio gyda ni wedi helpu i wneud eu busnesau’n fwy gwydn, o safbwynt ariannol a diwylliannol, gan helpu i sicrhau dyfodol ffermydd gweithredol yng Nghymru am genedlaethau lawer.